چوہدری ظفراللہ خان صاحب اور جنازہ قائد اعظم

 جماعت احمدیہ کے چوتھے خلیفہ حضرت مرزا طاہر احمد صاحب رحمہ اللہ تعالیٰ اس اعتراض کا جواب دیتے ہوئے فرماتے ہیں :۔

ترجمہ از انگریزی :۔”یہ بالکل غلط ہے ۔یہ ایک ایسا معاملہ ہے جوغیر ضروری طور پر ابھارا جاتا ہے ۔جبکہ اس واقعہ  کا اس سے دور کا بھی تعلق نہیں جو حضرت چوہدری ظفر اللہ خان صاحب کے  دل میں قائد اعظم سے محبت  تھی یا اس رویے سے جو حضرت چوہدری  صاحب کا قائد اعظم کے احسانوں کے بارہ میں تھا۔

دراصل قائد اعظم نے حضرت چوہدر ی صاحب کو مسلم لیگ میں اس لئے شامل کیا تھا کہ چوہدری صاحب اپنے آپ کو مسلمان کہتے تھے۔۔۔۔۔۔۔۔۔

یہ وہی قائد اعظم تھے کہ جن کے متعلق ملاؤں نے فتویٰ دیا تھا کہ یہ صحیح مسلمان نہیں ہیں۔بعض نے تو انہیں “کافر اعظم “تک کہہ دیا تھا۔اور ان میں سے ایک اب پاکستان کا صدر ہے ۔ تارڈ صاحب (محمد رفیق تارڈ)جوبہت فخر سے اپنے آپ کو  سید عطاء اللہ شاہ بخاری کا شاگرد کہتے ہیں۔جبکہ عطاء اللہ شاہ بخاری نے اس بات سے اتفاق کیا تھا کہ قائد اعظم کافر اعظم ہیں۔ اعتراض کرنے والے انکو تو کچھ نہیں کہتے۔ ایسا کہنے والا پاکستان کا صدر تک بن سکتا ہے۔پس یہ عجیب نفرت ہے احمدیوں سے ۔ کہ ظفر اللہ خان جن کے قائد اعظم سے بہت اچھے مراسم تھے، اگر وہ انکی نمازِ جنازہ نہیں پڑھتے اس لئے کہ وہ اصول پسند تھے۔ اور وہ سمجھتے تھے کہ مسلم لیگ کا ممبر ہونا الگ بات ہے۔ انہیں مسلم لیگ کا وفادار ہونا چاہیے ۔ لیکن ایک دوسرے کی نماز جنازہ پڑھناایک بالکل اور بات ہے۔نماز جنازہ ایک مذہبی حکم ہے ۔اور اس حکم کے بارہ میں ہمارے پاس ثبوت موجود ہیں کہ ایک فرقہ کے لوگوں نے دوسرے فرقہ کے لوگوں کے پیچھے نماز جنازہ پڑھنا حرام قرار دیا ہے۔یہ وہ بات ہے جس پر یہ لوگ یقین رکھتے ہیں پھر بھی یہ اعتراض کرتے ہیں۔انکے پاس کوئی دلیل نہیں ۔

اگر چوہدری صاحب نے نماز جنازہ نہیں پڑھی تو وہ 3 باتوں میں سے ایک کی وجہ سے نہ پڑھی ہو گی۔

1۔        پہلی بات تو یہ تھی کہ قائد اعظم کی نماز جنازہ کی امامت ایک ملا کر رہا تھا جنہوں  نے چوہدری ظفر اللہ خان کو کافر قرار دیا ہوا تھا۔جو یہ یقین رکھتا تھا کہ چوہدری صاحب مسلمان نہیں ہیں۔چوہدری صاحب ایک ایسے شخص کے پیچھے نماز کیسے ادا کر سکتے تھے جس نے انہیں دائرہ اسلام سے خارج قرار دے دیا تھا۔یہ ایک وجہ تھی ۔

2۔        دوسری وجہ یہ تھی کہ قائد اعظم کا مذہبی عقیدہ انکا ذاتی معاملہ تھا۔انکے فرقے کے لوگوں کا انکا جنازہ ادا کرنا کافی تھا   ۔اور دوسرے لوگ نماز جنازہ کے علاوہ بھی انکے لئے دعا کر سکتے ہیں۔

3۔        تیسری وجہ یہ ہو سکتی ہے کہ چوہدری صاحب نے اس وجہ سے بھی پڑھنے سے اجتناب کیا کہ دوسرے مسلمان چوہدری صاحب کے قائد اعظم کا جنازہ پڑھنے پر اعتراض کریں گے۔ کیونکہ یہی انکا وطیرہ ہے ۔اگر احمدی کسی غیر احمدی کا جنازہ پڑھنا چاہیں تو ملا اسکی سخت مخالفت کرتے ہیں۔اسکی مثال جہانگیر وٹو کی وفات کے وقت ملتی ہے۔جب احمدی انکا جنازہ پڑھنے وہاں گئے ، اور اس بات کی وصیت خود انہوں نے کی تھی کہ احمدی میرا جنازہ پڑھیں، تو وہاں  جن لوگوں نے بھی اس بات کی اجازت دی تو ملاؤں نے ان سب کی سخت مخالفت کی اور اعتراضات اٹھائے۔

پس امن عامہ کو قائم رکھنے کی خاطر ، ظفر اللہ خان صاحب کے لئے یہ سب سے موزوں تھا کہ وہ الگ سے کھڑے رہتے۔پس اس بات سے جماعت احمدیہ کے خلاف کچھ بھی ثابت نہیں ہوتا۔”

(لقاء مع العرب۔ 11فروری1998)

نماز جنازہ فرض کفایہ ہے