حضرت مسیح موعود علیہ السلام کے عمدہ خوراک اور پوشاک استعمال کرنے پر اعتراض

خدا تعالیٰ کے انبیاء اور اولیاء سب لوگوں سے بڑھ کر اس بات کے حقدار ہوتے ہیں کہ وہ خدا تعالیٰ کی پیدا کردہ نعمتوں سے فائدہ اٹھائیں  ۔ اگر پھر بھی یہ اعتراض ہو کہ خدا کے محبوبوں کو اچھی پوشاکوں اور اچھے کھانوں سے کوئی تعلق نہیں ہوتا ۔تو اس کا جواب یہ ہے۔

“آنحضرت ﷺ اکثر مشک اور عنبر استعمال کیا کرتے تھے۔”

(سیرت النبی ازشبلی نعمانی ؒ جلد اول 2ص 126 )

پھر آپ کے بارے میں مذکور ہے کہ

“کبھی کبھی آپؐ نہایت قیمتی اور خوشنما لباس بھی زیب تن فرماتے تھے۔حضرت عبد اللہ بن عباس رضی اللہ عنہ جب حروریہ کے پاس سفیر بنا کر بھیجے گئے تو و ہ یمن کے نہایت قیمتی کپڑے پہن کر گئے ۔ حروریہ نے کہا ۔ کیوں ابن عباس یہ کیا لباس ہے ؟بولے تم اس پر معترض ہو میں نے آنحضرت ﷺ کو بہتر سے بہتر کپڑوں میں دیکھا ہے ۔ (ابو داؤد کتاب اللباس باب الصوف الشعر)”

(سیرت النبی ازشبلی نعمانی ؒ جلد اول 2ص 125 )

“گوشت کی اقسام میں آپؐ نے دُنبہ، مرغ،  بٹیر، اونٹ،بکری،بھیڑ، گورخر،خرگوش، مچھلی کا گوشت کھایا ہے ۔دست کا گوشت بہت پسند تھا”

(سیرت النبی ازشبلی نعمانی ؒ جلد اول 2ص 124 )

“گھوڑے کی سواری آپؐ کو نہایت مرغوب تھی۔ گھوڑوں کے علاوہ گدھے،خچر، اونٹ پر آپؐ نے سواری فرمائی ہے ۔۔۔آپؐ کے خاص سواری کے گھوڑے کا نام لُحَیف تھا۔”

(سیرت النبی ازشبلی نعمانی ؒ جلد اول 2ص 127 )

آپ صلی اﷲ تعالیٰ علیہ وسلم کے بہت بڑے دشمن امیہ بن خلف کافر کا بیٹا صفوان بن امیہ جب مقام ” جعرانہ ” میں حاضر دربار ہوا تو آپ صلی اﷲ تعالیٰ علیہ وسلم نے اس کو اتنی کثیر تعداد میں اونٹوں اور بکریوں کا ریوڑ عطافرما دیا کہ دو پہاڑیوں کے درمیان کا میدان بھر گیا۔ چنانچہ صفوان مکہ جا کر چلا چلا کر اپنی قوم سے کہنے لگا کہ اے لوگو ! دامن اسلام میں آ جاؤ محمد (صلی اﷲ تعالیٰ علیہ وسلم) اس قدر زیادہ مال عطا فرماتے ہیں کہ فقیری کا کوئی اندیشہ ہی باقی نہیں رہتا اس کے بعد پھر صفوان خود بھی مسلمان ہوگئے۔ رضی اﷲ تعالیٰ عنہ۔

(زرقانی ج4ص295)

یہ روایت اس بات کا ثبوت ہے کہ آپؐ کے پاس اتنی تعداد میں مویشی تھے، تب ہی آپؐ نے وہ عطا فرمائے۔ پس حضرت مسیح موعود ؑ نے بھی اپنے آقا و مطاع حضرت نبی کریم ﷺ کی اتباع میں سادہ زندگی بسر کی تاہم جیسا کہ اچھا پہننا اور کھانا سنت نبوی ﷺ ہے ، حضرت مسیح موعود ؑ نے اس پر بھی عمل کیا۔